بختیار وهابزاده-وطنداش
وطنداش!
نه گوزل سسله نیر بو سوز
یعنی بیر وطنین اولادیییق بیز
آنامیز عینی دیر قارداشیق دئمک
من سنه آرخایام سن منه کومک
وطنداش! نه گوزل سسله نیر بو سوز
یعنی ایکی جاندا بیر اوه ییک بیز
گوجسوزوک، بیز هئچیک، سن ده، منده، تک
وطنه گووه نیب اولدوق وطنداش
منیم اوره گیمی قاناتسین گرک
سنین دیرناغینا ده ین چیرتما داش
وطنداش! نه گوزل سسله نیر بو سوز
یعنی بیر اقلیمده بویوموشوک بیز
سنی ده، منی ده، بویودن وطن
سنه ده آنادیر منه ده آنا
سنده جواب دئسن منده هر زمان
واحد آنامیزین خوشبختلیغینا
وطنداش! نه گوزل سسله نیر بو سوز
یعنی بیر قایناقدان سو ایچمیشیک بیز
او سو قلبیمیزده جوشدو، قاینادی
عینی بیر آدیله تانیتدی بیزی
وطنین عنوانی وطنین آدی
بیزه خاطیرلاتدی وظیفه میزی
وطنداش! نه گوزل سسله نیر بو سوز
وطن ابدی دیر گئدرگییک بیز
انسان قدرتلی دیر اوز وطنینده
بیلیریک، دونیایا بیز نییه گلدیک
او بیزی یارادان بیز اونا بنده
یارادان اوغروندا اولمه یه گلدیک
